VIVA CRISTO LIURAI! VIVA CRISTO LIURAI! VIVA CRISTO LIURAI!

DOMINGO KRISTU LIURAI NIAN

EVANGELHO: Mt,31-46

31“Wainhira Oan Mane mai iha nia gloria no nia anju sira hotu hamutuk ho Nia, Nia sei tur iha nia kadunan gloria nian. 32Povu hotu sei halibur an iha nia oin. Nia sei haketak ema sira hanesan bibi atan haketak bibi malae housi bibi Timor. 33Nia sei tau bibi malae iha nia sorin kuana, bibi Timor iha nia sorin karuk. 34Tuir mai, liurai sei dehan ba sira nebe iha nia sorin kuana: ‘Mai, imi nebe Ha’u Aman fo bensa, mai simu nudar liman rohan reinu nebe hadia tiha ba imi houri mundu hahu. 35Basa Ha’u hamlaha, imi fo han Ha’u; Ha’u hamrook, imi fo hemu Ha’u; Ha’u la’o rai, imi simu Ha’u; 36Ha’u isin tanan, imi fo hatais Ha’u; Ha’u moras, imi ba hare Ha’u; Ha’u iha dadur laran, imi ba hare Ha’u.’

37Iha oras ne’e ema diak sira sei hatan ba Nia: ‘Na’i, wainhira los mak ami hare Ita Boot hamlaha, ami fo han; hamrook, ami fo hemu? 38Wainhira los mak ami hare Ita Boot la’o rai, ami simu; eh ho isin tanan, ami fo hatais? 39Wainhira los mak ami hare Ita moras eh iha dadur laran, ami ba hare Ita?’ 40Liurai sei hatan ba sira: ‘Tebes, Ha’u dehan ba imi: wainhira imi halo buat ne’e ba ha’u nia alin kiik sira ne’e ida, imi halo mai Ha’u rasik.’”
41“Tuir mai, Nia sei dehan ba sira iha nia sorin karuk: ‘Imi hadook an housi Ha’u, imi sira nebe simu malisan, ba ahi rohan laek nebe hadia hela ba diabu ho nia anju sira. 42Basa Ha’u hamlaha, imi la fo han Ha’u; Ha’u hamrook, imi la fo hemu Ha’u; 43Ha’u la’o rai, imi la simu Ha’u; Ha’u isin tanan, imi la fo hatais Ha’u; Ha’u moras, Ha’u iha dadur laran, imi la ba hare Ha’u.’ 44Sira mos sei hatan: ‘Wainhira mak ami hare Ita Boot hamlaha ka hamrook, la’o rai ka isin tanan, moras ka iha dadur laran, ami la tulun?’ 45Iha oras ne’e, Nia sei hatan ba sira: ‘Tebes, Ha’u dehan ba imi: wainhira imi la halo buat ne’e ba kiik oan liu sira ne’e ida, imi la halo mai Ha’u.’ 46Sira ne’e sei hetan terus rohan laek, sira nebe diak sei hetan moris rohan laek.”

LORON DOMINGO SEI SAI DUNI LORON BOOT IDA,

LORON FESTA,

BAINHIRA IHA TINAN KOTUK NIA LARAN,

ITA HADOMI EMA SELUK, HANESAN HADOMI JESUS!

OIN SELUK,

LALIKA MOS LARAN MUKIT,

BUKA MORIS TUIR JESUS NINIAN NO AMAN MAROMAK NIA HAKARAK,

HO KBIIT, NA'I MROMAK ESPIRITO SANTO NIAN,

IHA TINAN LITURGIA FOUN:

ADVENTO 2008 - KRISTU LIURAI, 2009

DAI-LHES, SENHOR, O ETERNO DESCANSO...

OHIN, SANTA IGREJA CONVIDA ITA HOTU ATU HANOIN BA ITA NIA MATEBIAN SIRA. LIU LIU BA SIRA NEBE HAHORIS ITA, KOLE NO TERUS BA ITA, NO SIRA NEBE TULUN ITA HOSI ISILOLON, DOMIN KA KLAMAR IHA ITA NIA MORIS, NEBE MAROMAK BOLU TIHA ONA. SIRA PRECISA ITA NIA ORASAUN ATU BELE TAMA LALAIS IHA MORIS ROHAN LA'EK NO TO'O TIHA ONA KARIK, ATU TULUN FALI ITA. TANBA SIRA NE'E MAK ITA NIA SANTU SIRA NEBE HATENE DIDIAK LOLOS ITA.

MAIBE IHA LORON IDA OHIN, ITA NIA INAN IGREJA CONVIDA MOS ITA ATU HANOIN IHA ITA NIA MORIS, TANBA LORON IDA ITA MOS SEI MATE, HANESAN LIAMENON HOSI MATENEK IDA NEBE HARUKA HAKEREK IHA NIA RATE, ATU EMA SIRA NEBE BA VISITA BELE LEE: " O, EMA NEBE LA'O DADAUN NE'E, RONA LAI MAI: ORAS NE'E O MORIS, HA'U MOS ULUK MORIS; ORAS NE'E, HAU MATE, O MOS SEI MATE HANESAN HA'U!"

AMO PAPA BENTO XVI, HAMENO, ATU ITA LABELE HALUHAN HANOIN KONA BA MORIS LORON IKUS NIAN NEBE ROHAN LA'EK: MORIS TUIR MAROMAK NIA HAKARAK, ITA SEI HAKSOLOK ROHAN LA'EK; MORIS DOK HOSI MAROMAK NIA HAKARAK, ITA SEI TERUS ROHAN LAEK MOS!

MACAU, 2 NOVEMBRO 2008

PARABENS BA SANTO SIRA HOTU...

OHIN, IGREJA, COMEMORA SANTO HOTU HOTU NIA GLORIA!
SANTO BARAK ONA MAK IHA ONA ALTAR, MAIBE BARAK LIU TAN MAK, MASKI TOO ONA IHA MAROMAK FUTAR OIN, MAIBE IGREJA SEIDAUK BELE HAHI SIRA; BARAK MOS SEI IHA DALAN BA LALEHAN, IHA PURGATORIO...
MAIBE SEI IHA RAI NE'E MOS IHA SANTO BARAK, MAK HOTU HOTU NEBE LORO LORON BUKA HAMUTUK NAFATIN HO MAROMAK IHA SERVISU BA MAUN ALIN SIRA...
PARABENS NO BOAS FESTAS BA HOTU HOTU!
LA'O BA OIN NAFATIN, LIU LIU BA ITA SIRA NEBE SEI LA'O IHA RAI!
SAI SANTO HANESAN, AMAN LALEHAN SANTO!
AMEN!